Es gibt bei de Schwoba, es ischt wohl bekannt,
a Merkmal, so einzig, so typisch für’s Land.
So kräftig, so leuchtend, so deutlich, so schön -
an Trollinger-Zinka, wie herrlich zu sehn.
Voll ausgeprägt im Lauf dr Jahre
erreicht die Nosa ihren Schtand.
Dr Traubafarbschtoff zeigt die wahre
Verbundaheit mit Wein und Land.
Dr Rebasaft, so landeseiga,
krönt manch Gesicht voll schtolzer Zier.
“Drei Löwen” wäret zu vergeba,
als Herkunftszeicha do drfür!
Ob Schpätzla, Kehrwoch oder Alb,
dr Trollinger, der isch dabei.
Ko mr in Schwaben überhaupt,
je ohne diesen Tropfa sei?
Er hat net grad die höchschte Öchsla
und wird deswega oft verkannt.
Zur Schpätles langt’s ihm meischtens net
und trotzdem wird er g’lobt im Land.
Zum Trinka isch der Kerle recht,
zum guata Veschper sowieso.
Hasch Trollinger im Ranza drin,
dann wirsch du deines Lebens froh.
Dr Wengerter muass scho was könna,
denn dich zu zähma isch net leicht.
Dein Laub isch dicht, dein Holz isch schtark,
dein Wachstum isch fascht unerreicht!

In Schwaben bisch du unser Wei,
woanderscht Rarität.
Koi Wunder, dass a rechter Schwob
dich achtet, würdigt und verschteht.

Ja, dr Verschtand schteigt bis zur Nosa
und zeigt dir deutlich: Do gugg her -
dr Fachmo trägt sein Fachverschtand
als rota Zinka vor sich her!

Als Ausdruck hoher Kennerschaft
isch so ein Zinka sehr markant.
Er zeigt Profil und Lebensluscht,
mit Zinka isch mr wer im Land!

Hut ab vor solchem Mitbewohner,
der solche Auszeichnung erlangt.
Den Orda trägt mr schtolz voran:

Trollinger – dir sei gedankt.

Quelle: Rotzböbbela und andere Kataschtrophen von S. und W. Albeck, www.saitenwurscht.de